現年43歲嘅林志玲（Chiling）係中港台幾地都有名氣，正所謂「人怕出名」，早前林志玲被大陸無良商家冒名推出「林志玲 linzhiling」化妝品，仲用埋真‧Chiling啲相片等等推銷，搞到唔少消費者都誤以為係Chiling出品，搞到Chiling要訴諸法律。

今日上海巿華誠律師事務所就發出聲明，指受Chiling所託，就相關商家透過網絡、實體店大肆進行宣傳推廣同銷售該化妝品，更喺度告宣傳中使用Chiling嘅肖像，使廣大消費者同加盟商均誤以為該品牌嘅化妝品為Chiling經營或代言。但事實上該化妝品同Chiling毫無關聯，亦冇獲Chiling許可，該商家係非法盜用Chiling嘅肖像。

聲明指Chiling依法採取相關法律措施，國家工商行政理總局商標評審委員會（商標評審委員會）應Chiling申請，經審理後裁定對該盜用Chiling姓名嘅註冊商標「林志玲 linzhiling」（侵權商標）予以無效宣告，並指：「該案最後經北京巿高級人民法院做出終審判決，判決認定該盜用林志玲女士姓名的註冊商標『林志玲 linzhiling』之註冊及使用屬於故意攀附林志玲女士聲譽、謀取不正當商業利益的行為，構成《中華人民共和國商標法》規定之『以其他不正當手段取得註冊』的商標撤銷事由，最終確認維持商標評審委員會對侵權商標的無效宣告裁定。」

而華誠律師事務所亦喺聲明最尾部份，代表Chiling要求上述商家立即停止相關一切侵權行為、銷毁相關侵權產品、撒除所有侵權宣傳物料。而Chiling將乎情況，或繼續採取相關法律措施，追究相關機構及個人嘅侵權責任。

其後Chiling喺微博都有貼番律師份聲明，然後留言話：「感謝法律最終還事實以真相，盜用名字的商標被判決無效了。希望這些商家以後能恪守誠信經營的商業道德準則，不要再通過這樣不合法的方式誤導消費者了。」

雖然有啲麻煩事跟身，但Chiling心情好似還好，呢幾日都有更新社交平台，不過就唔知係咪用咗app嚟自拍，見佢面口好似有啲唔同咗，面尖咗、眼大咗，唔知Chiling會唔會介紹下呢個神app俾大家呢？

...

HK.ENTERTAINMENT.APPLEDAILY.COM

---

關鍵字：大陸    商標仿冒    人怕出名    化妝品     linzhiling    搶註    無效宣告